كود سبور//
عيطو بيراميدز المصري على الدولي المغربي وليد الكرتي باش يلعب معهم كاس القارات “إنتركونتيننتال”، وخا اللاعب كاين مع المنتخب الوطني المغربي المشارك فـ كاس العرب 2025 بقطر، واللي وصلت لربع النهائي، وهذا مشكل وازمة جديدة عند مدرب المنتخب المغربي طارق السكتيوي اللي أصلا مشى للبطولة ناقص بلا لاعبين مهمين من غير الاصابة اللي خلات عناصر اخرين ما يلعبوش بحال بنشرقي والهنوري.
وأعلن بيراميدز المصري اليوم الاربعاء على اللائحة ديالو المشاركة فـ كأس القارات، ومن ضمن اللاعبين اللي عيط لهم للمشاركة فـ البطولة كاين الدولي المغربي وليد الكرتي.
الناخب الوطني طارق السكتيوي خلال الندوة الصحافية اللي كاتسبق ماتش المغرب وسوريا فـ ربع نهائي كاس العرب، ما بغاش يتطرق للموضوع وقال انه من الأفضل ما يهضرش عليه.
المشكل ديال كاس العرب أنها مسابقة ما داخلاش ضمن لوائح الاتحاد الدولي والأجندة ديالو، داكشي علاش الأندية ما كايبغيوش يطلقو اللاعبين لمنتخباتهم باش يشاركو فيها، والقانون معهم، واخا الفيفا كايقولو دبا انهم معترفين بها والاتحاد العربي كايقول ان المسابقة كاتلعب ضمن لوائها، ولكن راه كاتبقى مسابقة مثيرة للجدل مادام ان الاتحاد الدولي ما دخلهاش فـ اللوائح ديالو، باش يفرض على الأندية يطلقو اللاعبين لمنتخباتهم المشاركة فيها.