كود – عثمان الشرقي //
كيأكد الدكتور طيب حمضي، طبيب وباحث فالنُّظُم الصحية، أن المغرب كيدخل هاد العام فموسم إنفلونزا مختالف على اللي ولفناه، حياش بدا بكري قبل الوقت ، وتزادت فيه عدد الحالات بوتيرة باينة ، من النص فنونبر بدات الأعراض كتكتار وكتبان قصح من السنوات اللي فاتت، وهادشي كيخلّي المختصين يتوقعو موجة قوية فالسيمانة الجاية .
السلالة الجديدة اللي تسمات فالإعلام “الإنفلونزا الخارقة” ما هي إلا نسخة متحورة من H3N2، ولكن فيها سبعات طفرات جداد تراكمو فصيف 2025 وخلاوها مختالفة على السلالة القديمة، هاد التحوّلات عطاوهت القدرة تفلت من المناعة ديال بزاف د الناس، وخلّات الفيروس ينتشر دغيا وسط المراهقين والشباب والكبار، ومن بعد دراري وباقي السكان ، كيف اللي وقع فاليابان وأمريكا وكندا وأوروبا.
هاد الانتشار السريع غادي تكون عندو انعكاسات على المغرب، كيتوقعو الخبراء ارتفاع كبير فالحالات وإصابات صعاب عند الفئات الحسّاسة بحال كبار السن، أصحاب الأمراض المزمنة، والحوامل، الناس اللي عندهم السمنة ولا المناعة ضعيفة ، وزيد عليهم الأطفال اللي بين 6 شهور و5 سنين. هاد السيناريو كيبان أنه غادي يزيد الضغط على المستشفيات والخدمات الصحية، وقدر يخلق غيابات كثيرة فالمدارس والخدمة.
وخا أن اللقاح ديال موسم 2025-2026 فيه غير السلالة القديمة من H3N2، الدراسات اللي خرجات من بريطانيا كيبانو أنه مازال كيعطي واحد المستوى د الحماية من العدوى، والأهم أنه كيوفر حماية مزيانة للحالات الخطيرة، واللي ما خداش اللقاح هاد الموسم باقي الوقت حيث الحماية كتبان بعد جوج سيمانات من التلقيح، وكتكون مهمة بزاف خصوصاً للفئات الهشة.
الأعراض ديال هاد المتحور باقاهي هي: سخونية طالعة، الرعدة، صداع، سيلان النيف، آلام المفاصل والعضام، والمحبة الناشفة ، ومنين كيبانو الأعراض، خاص المريض يبقى فدارو، يحاول ما يخالطش الناس، يغسل يديه بزاف، يهوي فين كاين ، وما يصيفطش دراري للمدرسة إلا كانوا مراض، الكمامة حتى هي كتعاون مني تكون دعوة مخلطة ،اما اللقاح حسب الخبراء، باقي هو أحسن وسيلة لحماية راسنا من المضاعفات الخطيرة والوفيات.