عمر المزين – كود///
بسبب الاكتظاظ اللي ولا معروف فعدد من المدارس بجهة فاس مكناس، خرج فؤاد رواضي، مدير الأكاديمية الجهوية للتربية والتكوين بالجهة، وقال بلّي الحل جاي فالطريق.
رواضي كشف بلّي الأكاديمية غادي تحدث 49 مؤسسة تعليمية جديدة العام الجاي، مع توسيع مؤسسات أخرى بإحداث 430 قسم إضافي، زائد 360 حجرة ديال التعليم الأولي، وكل هاد الشي بغلاف مالي كيوصل لحوالي 640 مليون درهم.
هاد التصريحات جات خلال انعقاد المجلس الإداري ديال الأكاديمية، اللي ترأسو سعد برادة وزير التربية الوطنية والتعليم الأولي والرياضة، نهار الثلاثاء اللي فات ففاس.
مدير الأكاديمية قال حتى بلّي السنة المالية 2025 عرفات افتتاح 47 مؤسسة جديدة، وتوسيع مؤسسات أخرى بـ376 حجرة إضافية، وزيد عليها 354 قسم ديال التعليم الأولي اللي احتضنوا أكثر من 484 قسم.
وبخصوص مشروع الريادة، رواضي هضر على النتائج الإيجابية اللي تحققات، خصوصاً على مستوى التحكم فالتعلمات فالسلك الابتدائي والإعدادي.
وبالنسبة للموسم الجاي، البرنامج كيتوقع إضافة 309 مؤسسة ابتدائية باش توصل نسبة التعميم لـ83%، بينما فالسلك الإعدادي غادي يتزاد 90 ثانوية إعدادية، بنسبة تغطية غادي توصل حتى لـ65%.