كود مراكش//
تعين محمد مشيشو، رسميا، والي ديال أمن مراكش، مدينة سبعة رجال، بعدما كان في هاد المنصب بالنيابة فالفترة اللي فاتت، من بعد ما تحال الوالي السابق سعيد العلوة على التقاعد.
“محمد مشيشو” اللي خدم مدة كبيرة في كازا وبين على حنة يديه في المهام اللي تقلدها، كا يتعتبر من الكفاءات الأمنية اللي راكمات تجربة كبيرة داخل جهاز الأمن الوطني، حيث سبق ليه شغل منصب نائب والي أمن مراكش، ومن بعد تكلف بتدبير شؤون الولاية الأمنية بالنيابة. وخلال هاد المرحلة، أشرف على عدد من الملفات الأمنية والتنظيمية اللي كتهم المدينة.
تثبيت “مشيشو” فهاد المنصب كيدخل فإطار حرص المديرية العامة للأمن الوطني على ضمان الاستقرار الأمني والاستمرارية فالتسيير، خصوصا وأن مراكش، مدينة سبعة رجال، كا تعتبر وجهة سياحية وطنية ودولية، وكا تعرف كثافة سكانية وحركية كبيرة كتطلب حكامة أمنية محكمة ومستقرة.