كود كازا ///
قال رئيس الجامعة الملكية لكرة القدم فوزي لقجع فلقاء مع الشباب البارح الجمعة 19 دجنبر 2025 باللي ماتشات كأس افريقيا للامم غادية تنقلهم الشركة الوطنية للاذاعة والتلفزيون “اس ان ار تي” ووضح بللي غادية تكون خبرة عالمية من الاجانب.
لقجع وضح هاد الامور فسياق تطوير كرة القدم المغربية قاريا ووطنيا. واضاف باللي هاد النقل الاحترافي للماتشات غادي لينا يخلي ارث مهم فبلادنا للبطولة الاحترافية اللي غادية توصل تنقل “فمستويات عالية” يضيف رئيس الجامعة الملكية المغربية لكرة القدم
طبعا النقل الاحترافي لماتشات البطولة الاحترافية، يضيف المسؤول، غادي يفتح امكانيات تسويق هاد البطولة وتطويرها وتطوير موارها المالية.
هاد القضية ديال النقل التلفزيوني ديال التلفزيون المغربي بخبرة عالمية، جبدها فسياق تطوير الكورة محليا. تطوير بداتو الجامعة من خلال تحويل الاندية الى شركات =الجانب القانوني= ثم استفادة الاندية المغربية من البنية التحتية اللي غادي يخليها سوا تنظيم كأس افريقيا او تنظيم كأس العالم. فهاد الشي كولو ممكن نرقيو كرة القدم المغربية على صعيد الاندية يشرح فوزي لقجع.