كود – Bfmtv //
موقع Pornhub العالمي تعرض الاختراق خطير من مجموعة ShinyHunters لي قالت انها سرقات كمية كبيرة ديال الداتا الحساسة ديال مستعملين Premium ، الهاكرز قالو باللي عندهم 94 جيغا ديال المعلومات فيها كثر من 200 مليون سجل، وكيستعملوها دابا فالابتزاز مهددين بنشرها إلا ما تخلصاتش الفدية.
هاد الداتا ماشي غير معلومات عامة، ولكن فيها تفاصيل دقيقة على سلوك المستعملين وسط الموقع، بحال تاريخ البحث، الفيديوهات اللي تشافو، شنو تليشارجا، التوقيت، وحتى الكلمات اللي كيتقلبو عليها .،هاد النوع ديال المعطيات يقدر يسبب فضيحة شخصية كبيرة، حيث كيكشف اهتمامات خاصة وحميمة بزاف.
عينات من الداتا اللي تسربات فموقع Bleeping Computer فيها معلومات شخصية واضحة، بحال الإيميل، الموقع الجغرافي التقريبي، نوع النشاط، أسماء الفيديوهات، والكلمات المفتاحية المرتابطة بها. وكالة Reuters حتى هي تأكدات من صحة جزء من هاد الداتا، بعدما تواصلات مع شي مستعملين قدام اللي قالو باللي المعطيات ديالهم صحيحة فعلاً، ولكن راها راجعة لسنين فاتت.
حتى إلا كانت هاد الداتا قديمة شوية، فالخطر باقي كاين، حيث نشرها يقدر يضر بالناس اجتماعياً ومهنياً، ويفتح الباب للابتزاز والتشهير دابا كيبقى السؤال مطروح: واش Pornhub غادي يخلص الفدية، ولا غادي يغامر ويواجه نشر هاد المعطيات الحساسة، فواحد من أخطر تسريبات الداتا فمجال المواقع الإباحية.
https://www.bfmtv.com/tech/actualites/cybersecurite/ils-hackent-pornhub-volent-les-donnees-des-clients-premium-et-font-chanter-le-site-en-exigeant-une-rancon-pour-ne-pas-diffuser-des-informations-tres-personnelles-et-explicites_AN-202512180786.html