كود سطات//
فسطات، مع المغرب ديال اليوم السبت 20 دجنبر الجاري، انتشر واحد الخبر، بعدما لقاو رجل كا يقولو أن العمر ديالو فايت خمسين عام شبعان موت داخل المنزل اللي كاريه وعايش فيه بوحدو، بزنقة مولاي إسماعيل.
المعطيات المتوفرة كا تقول أن الضحية كان ساكن بوحدو فالدار، و الجيران هما اللي فطنو للغياب ديالو، الشي اللي خلاهم يبلغو السلطات.
وفور التوصل بالإخبار، تحركات للعين المكان السلطة المحلية، البومبية، والبوليس، ومعاهم البوليس التقني والعلمي، بعد ما اقول الضحية ميت.
دارت المصالح المختصة الإجراءات المعمول بها، وتم نقل جثمان الهالك لمستودع الأموات بالمركز الاستشفائي الحسن الثاني بسطات، باش يتدار التشريح الطبي بأمر من النيابة العامة المختصة.
وحسب المعطيات الأولية، كيرجحو أن الوفاة تكون طبيعية، ولكن البحث مازال مفتوح تحت إشراف النيابة العامة، باش يتحددو الظروف والحيثيات الحقيقية ديال هاد الواقعة، ويبان السبب الدقيق للوفاة.