كود هناء ابو علي كازا ////
حضرت للافتتاح ديال كأس افريقيا للامم بالمركب الرياضي مولاي عبد الله بالرباط ول البارح الاحد 22 دجنبر 2025. حضرت لماتش مالي زامبيا البارح الاثنين 23 دجنبر فالمركب الرياضي محمد الخامس فكازا. قلنا فكود باللي الافتتاح كان رائع. واعر. شكلا ومضمونا. الكوريغرافيا والميساج اللي دوزو. مغرب منفاتح مفتاخر براسو بثقافتو بتاريخو وكيشوف فالمستقبل. التيران كان واعر بزاف. شحال من يوم ديال الشتا وبقى زربية. فهادي الشغل كان متقون. غير امور اخرى كتشوش على تنظيمنا التاريخي لكأس افريقيا للامم. حنا بدينا كبير خاص كلشي يكون كبير.
فماتش المغرب ضد القمر فافتتاح الكان كانو هادوك الستاديي اي اللي مكلفين بتوجيه الجمهور وتسهيل دخولو وخروجو فعدد منهم ما عارفينش فين خدامين. هادو جايباهم وكالات خدات المارشي من الكاف، صعبو الدخول للتيران. نهار الافتتاح تصورو جمال فتحي المدير التقني فالجامعة الملكية لكرة القدم واللي تحت اشرافو جيش ديال المدربين والمنقبين والخبراء اللي كيخدمو الكورة المغربية. هاد الاطار والانسان اللبق والمؤذب واللي واحد من مهندسي التغيير فالكورة المغربية جا مع مراتو معروض للافتتاح وسخسخوه. هادا راه مول العرس زعما. الشتا اضطر يحط طونوبيلتو بعيدة ويتكرفص بزاف. طبعا جمال بكبرياؤو وعارف الاجواء ما عيط لحد. دخل تفرج وعندو عدد من الاطر اللي دخلات كتوجد التقارير على طريقة لعب المنتخب ومن بعد ياخدهم المدرب وليد الركراكي. يعني راه جاي خدام واخا معروض.
المهم كرفصوه هاد الستاديي. ماشي المتطوعين. اللا. هادوك حاجة اخرى وكتكون مكتوبة على جاكيط اللي لابسينها “متطوعون”.
البارح مشيت شفت ماتش مالي ضد زامبيا اللي فمجموعتنا. وصلت مع صاحبي. كنقول صاحبي. مع الثلاثة تقريبا. كان التيران خاوي. باش غير نعرفو الباب منين داخلين بقينا كثر من 10 دقايق. كتسول الستاديي. يرسلك لباب ماشي ديالو. كتسول على شي مسؤول. ما مسؤول ما والو ما عارف والو. تلاوحنا، وحنا متبعين اش قالو لينا هاد الستاديي، بين 6 البيبان. كلشي ما عارفش. كلشي الا بنت جات وحتى هي تلفات فالباب المرة الاولى عاد دخلنا. كنت مع صاحبي وكانو معانا جوج خراين عاشو اللي عشناه. فهادوك البيبان تلاقينا مع 2 مواطنين جايين من زامبيا. عندهم التيكي ولكن دخلوهم فين كاين جمهور مالي. السيد وللي معاه قطع ساعات كثيرة وبغى يكون وينشط مع اولاد بلادو. حتى هادي حصلو يلقاو ليها حل هاد الستاديي.
السيدة اللي دخلاتنا قالت لينا باللي جابو وحدين ما عارفينش حتى التيران. ما يمكنش فزمن التطور والتطبيقات ووو يتلف شي حد فشي باب. هادوك خاصهم يكونو مترينين قبل. عارفين قنب بقنت التيران اللي غادي يكون فيه.
هاد الهفوات ممكن تتحل بسرعة ايلى الكاف جبدات ودنين هادوك الوكالات اللي خدات المارشي. غير جوج سوايع يديرو ليهم دويرة يعرفو كلشي.
من غير التيرانات كان مشكل النهار الاول وحتى البارح ديال الترانات. تعطلو بزاف. البارح فالصباح كان كونترولور فتران الرباط كازا حشمان وهو كيحاول يعطي تفسير على العدد لكبير من المسافرين اللي واقفين. مخلصين درجة اولى وواقفين. الدرجة الثانية مدكوكة. تخربقو الترانات واللي كيديرو لاناڤيت تسخسخو ووصلو معطلين للخدمة. كان السي لخليع يوجه كثر لهاد الكان. قبل هاد الشي اللي كانو باغيين يرجعو لمدنهم بعد الافتتاح شي دار بناقص وشي تسخسخ.
فهاد الشي ديال الترانات كاين التيجيفي، تقريبا كلشي ناضي وكاين تران بين كازا والرباط اللي كان كيدير 52 دقيقة وولى كيدير حتى ساعة ونص. كاين محطات مقادات بحال المسافرين واكدال وكازا بور وكاينة محطة هي وجه الرباط اللي دارو فيه 4 تيرات اللي هي الرباط المدينة مكرفصة. بعد فضيحة الهندسة اللي دخلات فيها اليونسكو تسنات السكك الحديدية بزاف باش تخدم المحطة التحت. كلشي مكفرص فهاد المحطة الزوينة بموقعها وبتاريخها. ايلى زغبك الله دخل هاد المحطة. الترانات خاص يكونو بوتيرة كثر كيف قالت السكك الحديدية. خاص يكونو نقيين وكيوصلو فالوقت. درنا افتتاح عالمي خاص كلشي يستافد منو.
