سامي العلوي ـ كود ابن احمد //
بوليس مفوضية الشرطة ديال ابن احمد طيح البارح الاثنين واحد فعمرو 60 عام متورط فقضية الاتجار فالبشر والنصب بعدما وهًم بزاف ديال الضحايا بالهجرة إلى أوروبا، او حطوه فالحراسة النظرية بتعليمات من الوكيل العام بسطات .
تفاصل هذا الفيلم جات بعدما تقدمو مجموعة من الضحايا بشكاية إلى الجهات المختصة أكدو فيها أنهم تعرضو للاستغلال من طرف هذا النصاب او المجموعة ديالو لي مزال الشرطة القضائية كتبحث عليهم او خاصهم يتشدو لان الضحايا من الفئات الهشة وسلبو لهم مبالغا مالية كبيرة.
مصدر “كود” أكد أن الأبحاث القضائية التي تباشرها مصالح الشرطة القضائية كشفات عن ريزو كبير ديال الاتجار فالبشر كينشط فجهة كازا سطات الأمر لي خلا الوكيل العام يعمق البحث مع هاذ المشتبه فيه لي تينحدر من مدينة ابن احمد، بعدما حالو البوليس اليوم الثلاثاء على النيابة العامة باستئنافية سطات .
المصدر نفسه، قال بللي هاذ المشتبه فيه لي معتقل اسمه (محمد.ب) له العديد من الضحايا للي تقاطروم على مفوضية شرطة ابن احمد هاذ العشية او صرحو بالأقوال ديالهم او عطاو إيفادات غدي تكشف الريزو ديال العصابة لي خلات الناس مصدومة.