گود الرباط//
أكد المغرب بقيادة الملك محمد السادس، مرة أخرى التوجه ديالو باليد الممدودة للجارة الجزائر، وهذا الشي بان من جديد فـ هاد كاس افريقيا 2025، اللي منظمها المغرب هاد الأيام.
المملكة المغربية قررت تعطي للمنتخب الجزائري يتريني فـ أكاديمية محمد السادس لكرة القدم، اللي كاتحمل اسم سيدنا اللي عندو رمزية كبيرة، وهذا امتياز كبير عطاه المغرب غير للجيران ديالو، حيث باقي المنتخبات تعطاوهم ملاعب أخرى فين يترينيو، والمنتخب الجزائري بوحدو اللي كان خذا شرف إجراء الحصة التدريبية ديالو قبل مباراة السودان ضمن الجولة الأولى من دور مجموعات كأس أفريقيا بأكاديمية محمد السادس لكرة القدم.
المغرب بهاذ المبادرة الجديدة راه كايعطي رسائل مرة أخرى للجزائر، وكاينفذ الخطاب الملكي على أرض الواقع، حيث الملك محمد السادس ديما كان كايأكد على اليد المغربية الممدودة بالخير للشعب الجزائري، والخطاب الملكي الأخير بمناسبة الاعتراف الأممي بمغربية الصحراء ضمن الحكم الذاتي، رسل ميساج واضح للدولة الجزائرية وخاطب رئيسها وقاليه “أدعو اخي الرئيس عبد المجيد تبون لحوار حقيقي”.