محمد سقراط-كود///
أي إنسان عاقل سواء ولد فاس أو لا إلى سولتيه على بلاصة الفان زون فين خاص تكون غادي يقوليك ساحة بوجلود، إلا المسؤولين في فاس قرروا يلوحوها في واد فاس في آخر الدنيا بعيدة على اغلب التجمعات السكانية في المدينة وجات غير في الخلى والغيس وجنب الواد، والى سولتي نفس العقلاء على شناهو أكثر مقطع طرقي مخرب ومهم وخاص إصلاحه بشكل عاجل؟ غادي بجاوبوك هو الطريق المدارية من مدخل فاس على بنسودة وطريق عين الشقف، لأنها من المفروض تكون طريق كتخفف الضغط على وسط المدينة ولي باغي يمشي للرشيدية او تازة او وجدة او الناظور والحسيمة، في الوقت لي طنجة مثلا فيها جوج طرقان مدارية حاليا مصلوحين ومضويين، هنا راه بحال الى كيديو لشي دوار جيهة انفكو.
فاش تقرر أن المغرب غادي ينظم كاس افريقيا وكاس العالم وان فاس غادي تكون من المدن أي غادي تستقبل منتخبات ويتلعبوا فيها ماتشات، الناس في المدينة استبشروا خيرا بل فاتوا الإستبشار ودازوا لأحلام اليقضة، بدات الهدرة على فاس المستبلية بقناطرها العديدة وانفاقها، والهدرة في الصفحات وفي القهاوي مكاين غير هنا غادي يدوز ترامواي، ولهيه غادي يدوز باساواي، وبين باب فتوح وبوجلود غادي يديرو مونوريل داير بالمدينة، في اللخر فاش فاقوا من الحلمة وبدا كأس افريقيا، فاس يالله جاها في حقها منتخب واحد لي شاد اوطيل واحد، وبعض الماتشات وجوج رومبوانات، وفان زون في الخلى والقفار جنب الواد، مخليين فاس كامل وداوها لاحوها في داك القنت، على هاد الحساب كانوا ينظموها في الرباط وكازا واكادير وحيد بالاك، فاس مسمية عليها منظمة كاس افريقيا وهي ماشافت منو والو.
وحتى گاع كون دارو منتخب واحد في فاس على الأقل يديرو السينغال لأنه منتخب مرتبط عاطفيا ودينيا بهاد المدينة، وفيها جمهور كثير ديالهم، والسينغاليين محبوبين في مدينة فاس وعندهم مكانة خاصة، راه المدينة القديمة عامرة بالطلبة ديالهم، وهنا أهم دفين للطريقة ديالهم سيدي حمد التيجاني، فاس بالنسبة ليهم كانت بحال الى غادي يلعبوا في بلادهم، ولكن كان للمنظمين رأي آخر، وحاليا التيران في خرجم المدينة في طريق صفرو والفان زون في خرجة المدينة طريق مكناس، والمدينة القديمة لأهم مزار سياحي وديني والاعلى كثافة سكانية ماحداها والو، راه قلب فاس وروحها هو المدينة القديمة وللأسف راها خاوية ومهجورة وماواصلها من كاس افريقيا والو، هاديك الفان زون لي حطو جنب واد فاس في عز الشتا والليالي كون غير داوها لمكناس گاع وبلاش منها، حسن ماتبقى محسوبة على فاس زورا وبهتانا.