وكالات//
حققات الجابونية هيساكو ساكاي، اللي عندها 92 عام، إنجاز كبير ومميّز فـعالم الألعاب الإلكترونية، من بعد ما ربحت بطولة قتالية فـلعبة “تيكن 8”، وسط دهشة وإعجاب ديال بزاف الناس اللي تابعو البطولة عبر الإنترنت. وقالت ساكاي من بعد التتويج ديالها باللي ما كانتش متوقعة تربح، ولكن فرحانة بزاف بهاد التجربة الزوينة فهاد السن.
تفوقت ساكاي فالبطولة على سبعة ديال المنافسين، وكانت كتلعب بشخصية “كلاوديو”، وهي مقاتلة إيطالية داخل اللعبة، وقدرات توصل للنهائي. فالماتش النهائي، واجهات غورو سوغياما اللي عندو 74 عام، وكان كيلعب بشخصية “ليلي”، وقدرات تحسم الفوز لصالحها بمهارة كبيرة.
تنظمات البطولة من طرف جمعية “كير” اليابانية ديال الرياضات الإلكترونية، واللي الهدف ديالها هو تشجيع كبار السن يشاركو فـألعاب الفيديو فجو تنافسي وترفيهي. وشاركو فهاد النسخة لاعبين أعمارهم ما بين 73 و95 عام، وهاد الشي خلاها مسابقة فريدة فعالم الألعاب الرقمية.
تدار البث المباشر ديال البطولة فـيوتيوب، وجبد آلاف المشاهدين اللي تفاعلو مع الحماس والأداء العالي ديال المشاركين، فنسخة جديدة من سلسلة “تيكن” المعروفة بالحركات القتالية الدقيقة وتنوع الشخصيات ديالها.
وأشادت تقارير علمية بهاد التوجه، وقالت باللي لعب ألعاب الفيديو ثلاثية الأبعاد يقدر يعاون فـتحسين الذاكرة عند كبار السن. وربح ساكاي كان مثال ملهم كيبين باللي السن ماشي عائق قدّام الشغف بالتكنولوجيا والتحدي، وكيحل باب الألعاب الإلكترونية لجميع الأجيال بلا استثناء.