محمد سقراط-كود///
الكرم وحسن الضيافة حنا ماليه والمغرب معروف بيه، ولكن هاد الهوس الجماعي بالتذلل للجزائر ومنتخب الجزائر وجمهورها وموسيقتها وتقاليدها، راه مكيديروش الكوريين الجنوبيين للشماليين واخا هوما راه دولة وحدة وتقسمات غير هادي سبعين عام، ومكيديروهش الماليزيين للسنغافوريين او للاندونيسيين واخا راهم عرق واحد وعدة مرات كانوا دولة وحدة، هاد حمى إظهار المغاربة لطفاء وكرماء مع الجزائريين راه مبالغ فيها ومعندها معنى، هاد العقدة هانية تكون عند الانسان الاورربي الأبيض من بعد ماستعمر العالم، عادي تكون عند الالمان من بعد الهولوكوست، عادي تكون عند اليابانيين مع جميع الدول الاسيوية، لأن هادو كانو مستعمرين هاد الأقطار ودارو جرائم وفضاعات، عادي أحفاذهم يكون عندهم نوع من تأنيب الضمير والخجل من الماضي، اليابان الكيوت حاليا راه اقود استعمار داز في التاربخ بالجرائم والابادة لي دار للشناوا ودول أخرى، عادي بتحولوا لكيوتتنس مبالغ فيه، ولكن حنا لاش.
في الصراع ديالنا مع الجزائر راه حنا هوما الضحية ماشي العكس، حنا هوما لي مشا لينا طرف من بلادنا، وتسلحات جماعة منا باش تحارب بلادها ودخلنا في حرب استنزفت البلاد والعباد، وفي اي خطوة في تاريخنا الحديث عمرنا لقينا جيرانا فيهم الخير، ومايعطيونا والو، يعطيونا غير التيساع، راه حنا لي يدنا ممدودة ليهم بالسلام، وسيدنا يخطب ويعاود ويهضر بالواضح أن يد المغرب ممدودة للسلام والخير والمنفعة المشتركة، ومع ذلك كنشوفوا منهم غير الشر، راه حنا لي كانوا باغين يقسموا لينا بلادنا وتسببوا لينا في حرب أهلية الأب حارب ولدو فيها، بات عبد العزيز المراكشي راه جندي مغربي ، وحنا لي طالقين علينا اعلامهم وبيادقهم يشوهوا فينا ويحرضوا ضدنا ليل ونهار، راه في نظري طبعا المغاربة خاص يبقى فيهم راسهم بسباب هاد المعاملة ديال جيرانا، وفي اللخر نشوفوا واحد التذلل مفرط وحفاوة بافلوفية.
إلى كاين شي شعب ومنتخب يستاهل الحفاوة والكرم بصح راه هو السينغال لي كانوا باغين يسيفطو لينا الحيش ديالهم يعاونا في حرب الرمال، وديما كشعب ودولة كنلقاوهم في جنبنا، وبيناتنا تازيخ وهوية وهوما عمقنا الافريقي الحقيقي، وكذلك الكوديفوار والكابون وعدة دول افزيقيا أخرى، اما الجزائر راها في آخر أي لائحة واخا يكونوا فيها الفضائيين، راه هاعلاش قلنا ليكم خاص الدولة تدير مشروع مجتمعي لتعزيز الشعور الوطني بقيادة موقع گود، لأنه عوض نشوفوا في مناسبة كروية بحال هادي مغاربة فخورين ببلادهم وثقافتهم وتاريخهم وعارفين يفرقوا بين صديقهم وعدوهم، عوض هاد المشاهد ديال التذلل البافلوفي المبالغ فيها.