أنس العمري -كود///
فالجمع العام ديالها الأخير، عاودت الفيدرالية الوطنية للصناعات الغذائية (FENAGRI)، تجدد الثقة فعبد المنعم العلج كرئيس، ومحمد عبد القادر العلوي كنائب للرئيس العام، لولاية جديدة ديال ثلاث سنين، فخطوة كتعكس الرضا ديال الأعضاء على طريقة التسيير والقيادة.
الفيدرالية ما وقفاتش غير عند التجديد، ولكن كشفت حتى على أولوياتها فالمرحلة الجاية، واللي كتركز بالأساس على تنزيل العقد-البرنامج الجديد للصناعة الغذائية، وتحسين الجبايات ديال القطاع، وتقوية التكوين المهني، وزيادة دعم التصدير، إضافة للترويج بقوة لعلامة “صنع في المغرب”.
ومن بين المستجدات اللي علنات عليها الفيدرالية تنظيم أول معرض دولي لمنظومة الصناعات الغذائية فالمغرب، واللي الهدف ديالو هو إبراز الإمكانيات الكبيرة ديال القطاع وتقوية الحضور ديالو وطنياً ودولياً.
هاد التوجهات كيترافقو حتى مع التزامات واضحة فمجالات تقليص الانبعاثات الكربونية، وتشجيع الاعتماد على المنتوج المحلي، وتقوية الحوار داخل القطاع، إلى جانب تعزيز الحكامة والشفافية داخل الفيدرالية.