المغرب شتت شمل بلجيكا واللعابا ديالها ضاربو حيث خسرو مع الأسود فالمونديال

كود سبور//

خلق المنتخب الوطني المغربي قربالة داخل المنتخب البلجيكي من بعدما ربحو الأحد اللي فات فالجولة 2 من كأس العالم قطر 2022، بنتيجة 2 أهداف لزيرو.

وكشف موقف “Rtl info” البلجيكي بلي اللعاب ديال منتخب بلجيكا ضاربو من بعدما خسرو الماتش ديال المنتخب الوطني المغربي.

وحسب نفس المصدر فالمغرب كمل للمنتخب البلجيكي داكشي اللي بقى له من مشاكل، حيث الجو فالأصل ما صافيش وسط اللعابا البلجيكيين وملي خسرو مع الأسود خرجات الامور على السيطرة.

ومن بين المشاكل اللي كانت من قبل الماتش ما بين المغرب وبلجيكا، كاين مشكل شخصي ما بين كيفن دي بروين ولكول تيبو كورتوا، حيث هاد الثاني خان الأول مع صحبتو هادي سنوات ومن هذاك الوقت ما كيتكلموش مع بعضهم.

أما هزيمة منتخب الشياطين أمام المغرب فخلات القضية تزيد تشعل فالفيستيير ديال بلجيكا، وضارب دي بروين وهازارد وفيرتونخن وروميلو لوكاكو تدخل وسطهم والأمور خرجات على السيطرة، الشي اللي خلى الناخب البلجيكي روبيرتو مارتينيز يدير اجتماع كبير باش يحل الأمور اللي تعقدات قبل من الماتش الحاسم ضد كرواتيا.

إقرأ الخبر من مصدره