كود الدوحة ///
دابا كلشي كيهدر على صورة اشرف حكيمي نجم المنتخب المغربي اللي عطى توني ديالو للوالدة ديالو وعنقها بعد الانتصار على بلجيكا. نجم كبير بقلب كبير واكثر من هاد الشي مرضي امو. هادي عند لمغاربة هي النيرفانا كلشي يتمنى يوصل ليها.
شي وحدين خارجين كيهدرو باللي مزيان الجامعة جابت عائلات اللعابة باش يقدرو يحفزو ولادهم فالمونديال. هو دافع نفسي مهم. غير هاد الشي راه ماشي جديد. بداتو الجامعة من مونديال روسيا. كانت خدات اوطيل لعائلات اللعابة وتكلفات بالاقامة والنقل واخا ولادهم قادرين يرسلوهم فطيارات خاصة. حتى فكأس افريقيا للامم بمصر كانت الجامعة دارت نفس العملية وخدات معاها عائلات اللعابة.
فاخر ماتش للمغرب ضد الكونكو باللي ربحوه الاسود ب4 لواحد تاني تعرضات عائلات اللعابة. كلشي عقل على بكاء ام الحارس لمحمدي باش تصاب الحارس بونو وغادر الماتش. كانت ام بونو ما قدراش تتفرج فهاداك الماتش. هاد الشي علاش اثر بشكل كبير على نفسية ام لمحمدي واخا ولدها حبس مزيان فداك الماتش.
فهاد المونديال بقطر وقع نفس الشيء. بالنسبة لمصدر جامعي ل”كود” راه ابسط حاجة ممكن ديرها المغرب لنجوم كبار اختارو بلادهم حبا وطواعية واخا كانت عندهم اغراءات كثيرة من دول ترباو فيها وتعلمو فيها وعلماتهم الكورة حتى وصلو لهاد المستوى العالمي.
المغرب بهاد التصرف كيرد الجميل للعائلة اللي كيلعب دور حاسم فاختيار هادو باش يلبسو توني لبلاد ورسالة للنجوم الجداد اللي مازال مترددين باللي اختيار القلب كيعرف كيفاش يرد عليه المغرب
دير الصورة ديال حكيمي فيها كلشي. فيها ولد كيبوس راس ميمتو. كيبوس راس اللي خلاتو اليوم نجم. خلاتو بطل وطني. دارت كلشي باش ينجح كيف كدير كاع الامهات. فيها ميمة محمية بدرابو لبلاد. محيمة ببلادها. مفتاخرة بيها. صورة واعرة بزاف وحنينة بزاف. حتى امو فلحظة الفخر هادي والانتشاء هادي كانت فرحانة وحشمانة. بحال ايلى كتقول ليه: يا وليدي راني درت غير واجبي. بحال كاع الامهات وكاع لولاد =لبنات= اللي كيعشقو امهاتهم
Laisser un commentaire