كود- سبتة //
عرفات مدينة سبتة، اليوم السبت 27 دجنبر، شتا قوية ، خلات مجموعة من الفيضانات فعدد من الأحياء والطرقان، وتسببات فاضطراب فحركة السير ودخلات الحملات لبعض الديور ، خصوصاً فالسفلي ولاكاڤات.
المناطق لي ضررات هي باساخي ريكريو، سانتا كاتالينا، لا مارينا، ازدواجية باسيو دي لاس بالميراس، مركز دياز فلور الرياضي، ومنطقة ألفاو، فين عرفت قنوات الواد الحار ضغط كبير ما خلاهاش تستوعب كميات الشتا لي كطيح فمدة قصيرة.
عدد من الطرقات غرقات بشكل مؤقت، الشي اللي فرض على الشوافرية يخففو السرعة ولا يبدلو الطريق وبحسب المعطيات المتوفرة، فالإنذار مازال مفعل، مع توقع يتزادو التقلبات الجوية اليوم فلعشية، الى حدود الساعة متسجلاتش حتى خسائر بشرية .
وخا هاد الجو المقلب والبحر الهايج والشتاء لي محبساتش عرفات المدينة محاولات كثيرة من مهاجرين من جنوب الصحرا وشمال افريقيا باش يقطعو البحر ولا يتعداو الگرياج ، مستغلين الروينة وسط المدينة بسبب الفيضان ، منهم لي وصل ، وكاين لي شدوه الحرس المدني حدا سوبر ماركت قبل ما يدوز لمركز الاحتجاز ،هاد الواقعة كتبين انه الحراكة كيستغلو الأجواء المظطربة باش يدوزو، وخا الظروف الجوية كتشكل خطر على حياتهم.