محمد سقراط-كود///
مايمكنش تكون الرباط مدينة ديال الرياضة والفن والسينما والموسيقى والسياحة والثقافة والمهرجانات والكتوبة والموسيقى والتاريخ والمستقبل وعاصمة البلاد من لفوق، كثير عليها هادشي وصعيب تنجح فيه كامل، بينما مدن أخرى عندها إمكانيات افضل ومافيها والو، مثلا حسب الحضور الجماهيري والجو العام كأس افريقيا كان خاص يتنظم في أكادير وشوية مراكش وكازا أما الرباط يخليوها لي باغي يخرج شي ورقة او يدفع لشي كونكور، وطنجة يخليوها للكوفيين يديرو فيها مسيرات نصرة لأي قضية في الكون من غير قضيتهم كمغاربة زكارة في الدولة، وبزاف ديال التظاهرات كتدار في الرباط بلا معنى، هي مدينة زوينة من اجمل مدن المغرب ولكن روحها ماشي ديال گاع التظاهرات، تقدر تقول عليها مدينة الفن بلا فنانة ولكن تصلاح كمعرض ماشي كمنشأ، راه لحد الآن الرباط عمرها نتجات شي ظاهرة ثقافية او موسيقية في المغرب، سلا عندها أثر على الثقافة في المغرب كثر من الرباط.
بالنسبة ليا أكادير خاص تولي هي مدينة التظاهرات الرياضية والفنية، مدينة زوينة بزاف بكورنيش بحال ديال كوبا كابانا، الرباط كمثال عندها غير ربع بحر بحال القفص، الجو زوين على طول العام وناسها مگورين في عقلهم وعدد منهم متفرغ للفن والابداع والنشاط، أكادير خاصها مهرجان للسينما عالمي، خاصها معارض للفنون المابعد حداثية، خاصها الشارع الرئيسي في حي السلام يتسد ويولي شارع ديال الستريت فود والنايت لايڤ، بحال جالان ألور بماليزيا، ولي بوحدو تحول لمزار سياحي كبير كيستقبل الملايين في العام، تالبرجت كلها خاص تحول لمعارض للفنون وهايدن بار، وحانات كتضرب فيها الموسيقى لايف تكون موجهة كثر للشباب الأوروبي بحال كيف كانت في التمانينات وجهة للسياح الالمان، وكانت جنة للموسيقى الغربية.
سنوات كانت التركيز على مراكش في السياحة وبصح تفرگعات سياحيا ولكن على حساب مدن خرى منها فاس واكادير، وحاليا اغلب الاهتمام كاين بالشريط الساحلي كن طنجة للكازا، اكادير مؤخرا بداو فيها مشاريع البنية التحتية، ولكن بوحدهم مكافيينش خاص مشاريع ثقافية وفكرية تخلي هاد المدن وجهة لانواع مثيرة سواء ديال السياح او ديال الاستثمارات والمشاريع، مايمكنش هاد التركيز المبالغ فيه على الرباط أي حاجة خاص تنظمها البلاد من طنجة للكويرة كيكون الرياط بوحدو هو أول خيار، آه يصلاح لمعرض الكتاب مثلا يصلاح لموازين بما انه مدينة آمنة خصوصا للنساء مقارنة بمدن أخرى، ولكن للرياضة راه بعيد كل البعد، ومن الأفضل التوجه لأكادير لأنها جنة مهدور حقها.