گود سبور//
ما لقاش البلجيكي هوگو بروس مدرب جنوب إفريقيا، شي سبّا للخسارة مع مصر فـ الماتش اللي فات ضمن الجولة الثانية من كأس إفريقيا، من غير أنه يهرّب النقاش لشي حوايج بعاد على التكتيكي، ويحاول يضرب فـ التنظيم ديال البطولة بشي حوايج ماشي بصح.
المدرب البلجيكي وباش يغطي على الفشل ديالو وخسارة جنوب إفريقيا مع مصر فـ تيران أكادير، قال بلي كانت العائلة ديالو فـ التيران وأن مراتو قالت له بللي الجمهور دار الفوضى، والتنظيم ما كانش مزيان، وبلي كانت خايفة حيث حتى حفادو كانو تماك وسط الجمهور، وزاد وقال بلي ما كايحسش بالأجواء اللي حس بها فـ الكوت ديفوار والگابون وأنه ما كايحسش بأجواء كأس إفريقيا.
الهضرة ديال هوگو بروس كاتجي فـ الوقت اللي الأفارقة والعالم منبهر بتنظيم المغرب لكأس إفريقيا 2025، والمتتبعين سوا اللي حضرو الماتشات فـ التيرانات أو تفرجو فـ التلفزة كايشهدو على أن نسخة إفريقيا “المغرب2025″، هي أحسن نسخة فـ تاريخ الكان، مع العلم أن الاتحاد المصري لكرة القدم الخصم ديال جنوب إفريقيا فـ الماتش، شكر الجمهور المغربي على الحضور للمباراة.