عثمان الشرقي – كود //
نهار الأحد فبزاف من الثقافات والأديان يوم ماشي عادي فالأسبوع حيت عندو دلالة خاصة ومعاني رمزية كتختلف من بلاد لبلاد ومن ثقافة لثقافة .
فالمسيحية يوم الأحد معروف بيوم الراحة والصلاة، حيث هو اليوم اللي ناض فيه المسيح من الموت وكيعتبروه نهار مقدس للعبادة سوا الكاثوليك اوالبروتستانت لي كيعطيوه أهمية كبيرة، وبزاف من المسيحيين كيعتابروه فرصة باش يجمعو العائلة ويلمو الشمل، أما عند اليهود النهار المقدس هو السبت (الشبات)، ولكن لحد كيكون البدية ديال السيمانة .
فالثقافة الإغريقية القديمة، لحد مرتبط بالشمس والإله هيليوسس (Helios)، اللي كان هاز الشمس فالسما وكيسوقها بكروستو النارية، الناس كانو كيعتابرو لحد نهار مهم فيه لينريجي والحياة، وكيقدمو فيه قرابين صغيرة باش يضمنو الزهر والنجاح، فالأساطير الإغريقية الأحد كيكون يوم البداية والحركة، حيث الشمس كتعطي القوة للناس فهاد النهار باش يواجهو المحاين .
فالأساطير الرومانية، الاحد مرتبط بالشمس (Sun)، ومن هنا جا الاسم ديالو فالإنجليزية “Sunday”، الشمس عند الرومان كانت رمز الحياة والقوة، وناس كتخلّي نهار لحد للأنشطة اللي كتجدد الروح، بحال الطقوس والاحتفالات، أما فاليابان الأيام مرتبطة بالكواكب وخصوصا الشمس، والأحد (Nichiyōbi) كيتعتبر نهار حتى هو ديال الشمس، وكانو الناس كيديرو فيه طقوس صغيرة، فالهند الاحد مرتبط بالكوكب الشمسي وبالإله سوريّيا، وكيعتبروه نهار للعبادة والتأمل، والناس كيصومو أو كيصلّيو فيه و يتفايلو به.
فالمغرب من نهار جات فرنسا ودارت الدولة الحديثة ولاو الناس كيستغلوه باش يقضيو أغراضهم ولا يسافرو فيه ولا يمشيو للسوق أو الحمام، ومن الأمثلة المتداولة عليه: “نهار الاحد مكاين حد”.
فالموسيقى كاينة أغنية “Sunday Girl” ديال فرقة Blondie الأمريكية، لي من الناحية الفنية والثقافية عندها قيمة خاصة حيت كلمات الأغنية كتوصف حالة الوحدة والفراغ لي كيحسو بها الناس غالباً نهار الأحد، هاد اليوم كيكون بعيد شوية على روينة ديال سيمانة، وكيعطي فرصة للانعزال والتفكير فالحياة، والحب والأحاسيس الداخلية، الصوت ديال المغنية Debbie Harry والنغمة ديال الموسيقى، خلات الأغنية تولي تعبير شعوري عند المستمعين على نهار الأحد.
فالشعر محمود درويش كيقول على هاد النهار: الورد مكيفكرنيش فشكون جابو لي، اليوم الاحد عطلة حتى على الذكريات، وعطلة على كلشي.
فيه الأمبراطور تيكون ناشط وفرحان و كيلعب مع الكلاب، وكايشرب الشمبانيا، وكايعوم فالرغوة…كلشي فيديه الحقيقة والدوام والأبد.