وكالات//
مات واحد البيلوط بعدما طاحت طيارة خفيفة فمياه البحر قدّام شاطئ كوباكابانا المعروف فمدينة ريو دي جانيرو فالبرازيل، وكان داير مهمة ديال جرّ لافتة إعلانية، وهي أول مهمة خدام بها، حسب ما قالت السلطات المحلية.
فرق الطوارئ قالت باللي الطيارة طاحت فالبحر قرّيب من الشاطئ مع حوالي الثانية ونص ديال الظهر بالتوقيت المحلي، فواحد الوقت اللي كان فيه الزحام ديال المصطافين، وهاد الشي خلا حالة ديال الخوف والهلع وسط الناس اللي كانوا تما. وأضافو أن جثة الطيار تْنقلات لمعهد الطب الشرعي باش يكملو إجراءات التعرف عليها رسمياً.
فرق الإنقاذ ديال الوقاية المدنية تحركو بسرعة لمكان الحادث، واستعملو الزلاجات المائية وقوارب مطاطية، مع غواصين ودعم جوي، وحتى أجهزة السونار باش يعاونو فالعثور على حطام الطيارة فقاع البحر.
وتبيّن فشي فيديوهات تصوّرات بكاميرات المراقبة أن الطيارة هبطات بشكل مفاجئ قبل ما تضرب فالماء على مسافة قصيرة من الشاطئ.