وكالات//
كيحتافل الممثل البريطاني أنطوني هوبكنز بمرور 50 عام على التعافي ديالو من بلية الشراب، وكيأكد باللي “الحياة ولات حسن بزاف” من بعد ما خدا القرار باش يوقف ويطلب المساعدة.
وفي فيديو نشرو فحسابو على إنستغرام، قبل بيومين من عيد ميلادو الـ88، رجع النجم اللي ربح الأوسكار لواحد اللحظة مفصلية فحياتو، ملي كان قريب يضيع حياتو مللي كان سايق الطوموبيل وهو سكران بزاف. وقال هوبكنز بلّي داك التجربة كانت بحال جرس إنذار خلاه يعترف بالمشكل ديالو ويبدا طريق التعافي.
ووجّه هوبكنز رسالة مباشرة لأي واحد كيعاني من الإدمان، وطلب منهم يوقفو ويطلبو المساعدة، وزاد قال: “اختار الحياة… ومن بعد اختار مزيد من الحياة”، وختم كلامو بتمنياته بعام جديد سعيد للجميع.
وماشي هادي أول مرة كيهضر فيها هوبكنز بصراحة على المعاناة ديالو فالماضي. ففي المذكرات ديالو We Did Okay, Kid اللي خرجات فشهر أكتوبر اللي فات، حكى على السنوات الصعيبة اللي دوزها بسبب إدمان الكحول، وقال بلّي ما كانش واعي بخطورة الحالة ديالو حتى تدخل طبيب. وكان عندو 37 عام ملي قال ليه الطبيب باللي الحالة الصحية ديالو بحال ديال راجل فعمر 50 ولا 65 عام.