عمر المزين – كود///
كشف تقرير ديال المندوبية السامية للتخطيط باللي الناتج الداخلي الإجمالي بالقيمة سجل ارتفاع بـ5,7 فالمية خلال الفصل الثالث ديال 2025، مقابل 8,7 فالمية نفس الفترة ديال السنة الماضية.
والمندوبية قالت فهاد التقرير، اللي توصلات بيه “كود”، باللي بفضل الارتفاع الكبير فصافي الدخول من الخارج بـ14,5% بعد ما كانت غير 0,5%، وصل نمو إجمالي الدخل الوطني المتاح لـ6,2 فالمية بدل 8,2 فالمية فـ2024.
ومع الارتفاع ديال الاستهلاك التالي الوطني بـ5 فالمية مقابل 6,1 فاليمة العام اللي فات، استقر الادخار الوطني فـ29,7 فالمية من الناتج الداخلي الإجمالي عوض 28,7 فالمية.
وفنفس السياق، طلع إجمالي الاستثمار لـ32,6 فالمية من الناتج الداخلي الإجمالي مقابل 31 فالمية، وهو ما خلّى الحاجة لتمويل الاقتصاد الوطني تتفاقم وتوصل لـ2,9 فالمية من الناتج الداخلي الإجمالي بعد ما كانت فـ 2,3 فالمية العام الفايت.