محمد سقراط-كود///
إلى غادي نديرو جامع او قاعة للصلاة في الملاعب خاص نديرو حتى كنيسة وجوج گاع وحدة للكاتوليك ووحدة للبروتيستانت ونديرو سيناغوغ لليهود المغاربة والأجانب لي غادي يتفرجوا، راه هادوك ملاعب رياضية مديورين للناس من جميع الديانات والطوائف والمعتقدات ماشي ملاعب خاصة بالمسلمين بوحدهم دون غيرهم، والى تدارت قاعة للصلاة غدا يطالبوا بالشورط الشرعي من السرة للركبة وبعدو يطالبوا بمنع العيالات من دخول الملاعب، ومن بعد تولي تشوف الحكم كيحسن لشي لعاب حيت داير القزع بحال لي وقع في السعودية أيام المد الوهابي، قبل مايجي الامام المتغلب محمد بنسلمان ويدير القطيعة مع هاد الحماق.
الملاعب الرياضية هي قلاع علمانية ماخاصش تخضع لمنطق ديني، وحتى الى كانت قاعة للصلاة خاص تكون صالحة لجميع الديانات لي بغا يتعبد تكون بلاصة خاوية يمشي ليها يعبد آش بغى في خاطروا، الموشكيل ديال قاعات الصلاة هو غادي يتمنع يدخلها أي واحد آخر ماشي مسلم، وهنا راه كنمارسو الاقصاء بما اننا كنظموا تظاهرات قارية وعالمية، راه عاد هادي شهر فريق كوريا شمالية ربح كاس العالم ديال العيالات من المغرب، كون طالبونا حتى هوما بقاعة فيها تمثال رئيسهم يتبركوا بيه مع الصباح، ودابا نيت راه كثر من نص المنتخبات المشاركة مسيحي او دول نصها مسيحي ونصها مسلم وكذلك جمهورها، مايمكنش تدير لوحدين قاعة لصلاتهم ولخريين لا، وزايدون بنادم مسافر وشاد الطريق وماقادرش يجمع العصر والمغرب بالتقصير ويخرج من باب واسع ويسالي من هاد البكائيات.
في الوقت لي المغرب كينظم أحسن گاس افريقيا في التاريخ من حيت جودة الملاعب والظروف وحتى الجو داكشي أوروپي، ضروري تسمع أصوات لي كتقلب على العيب في ايتها حاجة، ودابا خارجين لاواه مكاينش أماكن الصلاة، لاش باغي تصلي في التيران نتا اصلا، صلي في دارك صلي في الجامع صلي في نفسك، صلي فوق الكرسي وسط الماتش بحال لي كيديرو الناس في التران، راه هاد المطالب ديال أسلمة الفضاء العام، راه شفناها باش كتسالي قبلزفي دول كثيرة، راه بهاد المنطق علاش مكاينش قاعات الصلاة قرب منصة السويسي في موازين، وعلاش مكاينش عاقة الصلاة في سينما الريف يخرج بنادم يصلي جوج ركعات في الانترميسيون، هاد الباب كيبدى بقاعة الصلاة وكيسالي بالكرة حرام والمرة بلاصتها الكوزينة والجهاد في سبيل الله واجب على كل مسلم.