وكالات//
هزّات موت تلميذ بريطاني عندو 12 عام الوسط التعليمي والاجتماعي، من بعد ما توفى فحادث مأساوي وهو كيحاول يقلّد مشهد ديال فقدان الوعي من المسلسل الشهير Squid Gameاللي كيتعرض فـمنصة نتفليكس، حسب ما نقلات وسائل إعلام بريطانية.
وحسب التقارير، فالطفل اللي سميتو سيباستيان سيزمان لقاوه مغيًب فالدروج ديال دار عائلتو فغرب يوركشاير، وكانت دايرة ملاءة مع رقبتو، من بعد ما حاول يخنّق راسو تقليداً لواحد المشهد الدرامي. ورغم تدخل الإسعاف ومحاولات إنعاشو، إلا أنه توفى من بعد فالمستشفى.
وكشفت التحقيقات أن المشهد اللي حاول يقلدو كان محفوظ فالهاتف ديالو، وحتى صيفطو قبل فگروب عائلي فـ”واتساب”. وبان كذلك فالسجل ديال التصفح أنه تشاف فيديو فـ”يوتيوب” على الإسعافات الأولية بعنوان “كيفاش تنجو من الاختناق بوحدك”، وما لقاوش حتى دليل كيبيّن أنه كان مشارك فشي تحديات إلكترونية خطيرة.
وفنفس السياق، حذّرو خبراء الصحة من أن بحال هاد المحاولات تقدر تسبّب فضرر دائم فالدماغ ولا حتى الموت فدقائق قليلة، ونبّهو لخطورة تقليد مشاهد العنف ولا فقدان الوعي اللي كاتنتاشر فبعض الأعمال الدرامية، واللي سبق ترتابط بحوادث مشابهة فعدة دول.
ورغم الإشاعات اللي دارت فمواقع التواصل الاجتماعي، وضّحات الشرطة قدّام المحكمة أنه ما كاين حتى شبهة جنائية، وخلص مساعد الطبيب الشرعي إلى أن الوفاة كانت نتيجة حادث عرضي ناتج عن “سلسلة ظروف مأساوية بزاف”. وفالمدرسة، عمّ الحزن وسط التلاميذ والأساتذة، وتوصّف سيباستيان بأنه طفل محبوب ومرح، عندو حس الدعابة وكيدير أثر زوين بين صحابو.