عمر المزين – كود///
البارح الاثنين عرفات عاود فاس حادث انهيار واحد الدار من 3 إيطاج فمنطقة سهب الورد اللي فيها عدد من الأحياء الشعبية، بالإضافة إلى انهيار سقف كاين فحي الرميلة بالنفوذ الترابي للملحقة الإدارية الأندلس قلب المدينة العتيقة ديال فاس.
وحسب المعلومات اللي حصلات عليها “كود”، فإن الدار لي رابت من ثلاثة طوابق كانت خاوية من الناس، وقالت مصادرنا باللي السلطة كانت خوات الناس اللي فيها هادي أزيد من سيمانة حقاش كانت مدرجة ضمن المباني المهددة بالانهيار.
وبخصوص السقف اللي راب فحي الرميلة، تضيف مصادرنا، فإن هاد الدار كان فيها الدعم باش ماتريبش، وكتساين نوبتها في الإصلاح، وكانت شي مرا كبيرة تما لكن ماوقع ليها والو ونجت من الموت.
كاين عدد كبير من الديور فالمدينة العتيقة ديال فاس مزال ما ترمموش، وهنا المسؤولية ديال فؤاد السرغيني مدير وكالة التنمية ورد الاعتبار لمدينة فاس. شحال من دار مزال ما خضعاتش للترميم فالمدينة العتيقة؟ شحال من مدار كتهدد سلامة الناس.
طبعا المراقبة كتتحمل المسؤولية ديالها عدد من الجهات. شكون يراقب هاد الوكالة اللي هادي سنوات وهي مكلفة بترميم الديور اللي ف المدينة العتيقة والمآثر التاريخية. علاش مزال الديور ف المدينة العتيقة مخضعوش للترميم بالزربة وغادية الوتيرة ثقيلة بزاف.
https://www.facebook.com/share/p/1H3uDdLUfM/