گود سبور//
كايبان أن مكونات منتخب مصر ما مقدرينيش دعم الجمهور المغربي لهم فـ مدينة أكادير، وبحالا كايصحابهم راه ناس المدينة ما عندهم ما يدار.
وبعد الحركات الاستفزازية اللي دار مدرب منتخب مصر حسام حسن ملي سالا ماتش مصر ضد البنين البارح الاثنين فـ ثمن نهائي كاس إفريقيا فـ تيران أكادير الكبير، واللي نكر أنه دارها للجمهور المغربي، خرج اللاعب ديالها احمد سيد اللي كايقولو ليه زيزو، وقال فـ تصريح بعد الماتش بلي غادي يشري التذاكر ديال الماتش الجاي ويفرقهم على الجمهور المغربي بأكادير باش يحضرو الماتش ديال الربع، حيث ما جاوش للماتش ديال الثمن بسبب أن التيكي كان كايتباع فهاد الماتش ماشي تفرق فابور.
اللي خاص يعرف هاد زيزو ومكونات المنتخب المصري هو أن الجمهور المغربي راه غير بليزير منو حضر لهادوك الماتشات الأولين ديال منتخب مصر فكأس إفريقيا، باش ينجح البطولة جماهيريا، وشجع المنتخب المصري غير تعاطفا وصافي، وراه الجمهور فـ أكادير مشى حضر الماتشات اللي فاتو ديال مصر غير باش يشوفو نجوم ديال ليفربول ومانشستر سيتي بحال محمد صلاح وعمر مرموش وصافي قنعو منهم، وماشي ناس اكادير مساليين قبهم وما عندهم ما يدار يبقاو غاديين للتيران يتفرجو فـ ماتشات مصر ولا محتاجين اللي يعطيهم التذاكر فابور.