وكالات//
قالت مجلة “بيبول” اللي كتهتم بأخبار المشاهير أنه وصلها تسجيل صوتي كيبان منّو أن فيكتوريا، بنت الممثل الأمريكي تومي لي جونز، ممكن تكون توفات بسبب “اوفر دوز‘‘.
وتلقات جثة فيكتوريا جونز، اللي كان عمرها 34 عام، نهار الأول ديال يناير ففندق “فيرمونت” فسان فرانسيسكو.
وقالت العائلة ديالها فبيان للمجلة، فتعليقها على الوفاة ديال فيكتوريا: “كنقدّرو بزاف الكلمات الزوينة والدعوات الطيبة”، وزادت: “كنطلبو منكم تحترمو الخصوصية ديالنا فهاد الوقت الصعيب. شكراً ليكم”.
وفالتسجيل الصوتي، تصنّف البلاغ اللي كيهضر على الحادثة اللي كانت متورطة فيها فيكتوريا على أنه “رمز 3 ديال جرعة زايدة، وتغيّر فاللون”. وفحالات الجرعات الزايدة ديال المخدرات، “تغيّر اللون” كيقصد به الزرقة اللي كتكون بسبب نقص الأكسجين فالدم.
وتشدّات فيكتوريا جوج مرات على الأقل العام اللي فات، حسب سجلات المحكمة، بتهمة حيازة المخدرات.
وقال مصدر فالشرطة باللي ما كيشكّوش فشي عمل إجرامي فوفاة فيكتوريا، ولكن السبب الرسمي ديال الوفاة مازال ما تعلنش عليه حتى دابا.