“البحر من بعيد”.. فيلم جديد كيهضر على الهجرة والمثلية الجنسية فاالسينمات المغربية

كود -كازا //

ابتداءً من 21 يناير، غادي تبدا القاعات السينمائية فالمغرب تعرض فيلم جديد سميتو “البحر من بعيد” من إخراج سعيد حميش، فيلم كيهضر على واحد الموضوع لي كيعني بزاف ديال الشباب المغربي: الهجرة لأوروبا، والحلم ديال الحرية والعيش بكرامة.

الفيلم كيتبع قصة نور، شاب عندو 27 عام، دخل لمدينة مارسيليا الفرنسية بطريقة سرية، وهو داير فبالو يبدا حياة جديدة بعيد على الفقر والبطالة والضغط الاجتماعي. ولكن الواقع ما كيكونش ساهل، وكيبان ليه باللي الحياة فالمنفى عامرة صعوبات، وحدة، وتهميش.

“البحر من بعيد” ما وقفش غير عند الهجرة، ولكن دخل حتى فمواضيع حساسة بحال الهوية والميولات الجنسية، وكيبيّن كيفاش بعض العلاقات كتكون معقدة وسط الغربة، خصوصاً ملي كيكون المهاجر ضعيف قانونياً واجتماعياً ،فهاد السياق كيتعرف نور على بوليسي فرنسي ومرتو، وهاد التعارف كيقلب حياتو ويدخلو فدوامة ديال مشاعر وتجارب ما كانش حاسب ليها حساب.

أحداث الفيلم كتدوز ما بين التسعينات وبداية الألفينات، وكتعكس واحد المرحلة لي فيها بزاف ديال المغاربة  شدّو الطريق لأوروبا، هاربين من الفقر وقلة الفرص، وكيجمعهم نفس الحلم ولكن كتفرقهم الظروف والاختيارات.

الفيلم كيورّي حتى الحياة الليلية، الصحبة، العلاقات العاطفية، ومحاولات العيش وسط مجتمع ما كيرحمش، وكيطرح أسئلة كبيرة على الحرية، الحب، والحدود بين الرغبة والواقع.

“البحر من بعيد” مرشح يدير روينة فالمغرب، حيث كيهضر على مواضيع مازال طابو، ولكن بطريقة فنية كتخلي المشاهد يفكر ويطرح الأسئلة، بلا ما يفرض عليه الفيلم  شي جواب .

إقرأ الخبر من مصدره