كود – عثمان الشرقي //
لحسن الخنيفري وفاتي الخنيفرية أكدوا لكود بلي العلاقة اللي كاتجمعهم وسط الساحة الفنية مبنية على الاحترام والتفاهم، وقالت فاتي الخنيفرية أن لحسن إنسان ضريف وولد الناس، وما لاهو لا رقية وباقي المجموعة ، وأكدات أنه كيتعامل معاهم بحال خواتاتو ماشي شيخات، وأن الجو ديال الخدمة معاه فيه بالراحة وبعيد على أي تعالي أو تكبر.
وبخصوص موضوع “الخلعة”، أكدات فاتي الخنيفرية لكود أن الإحساس بالخوف أو التوتر كيكون غير فالبداية ديال المسار، حيث الفنان كيبدا بشوية ديال لوتراك، ولكن منين كيبان تفاعل الجمهور وكيحس الفنان بالإعجاب، كيمشي داك الإحساس وكتبقى غير الفرحة والطاقة الزوينة اللي كتعطي القوة فوق المنصة.
وفي حديثها على البنات اللي باغيين يحترفو المهنة، أكدات فاتي لكود أنها كتنصحهم يخليو الحرفة نقية ومحترمة، حيث بزاف ديال الناس كبرو بها وليداتهم وبناو بها مستقبل ديالهم، وشددات على أن الجمهور خاصو يشوف الفن كفن، وماشي يربطو بحوايج أخرى، حيت سمعة الشيخة مستهدفة وما مزيانش شي واحد يسوق معلومات غالطة كتسيء للضومين كامل.
أما بخصوص الكلام اللي كيتقال على القدرة العلاجية، فأكدوا لكود أنهم ماشي طبيبات، لا فرمليات ولا أستاذات، ولكن الدور ديالهم كيبقى فالتخفيف من الاكتئاب والضغط النفسي، وزادت فاتي الخنيفرية أن الموسيقى غداء للروح، وبالنسبة الياقة البدنية والسوفل قالت حاجة ربانية، قبل ما تختم كلامها بتوجيه الشكر لموقع كود على المتابعة والاهتمام.
من جهتو، أكد لحسن الخنيفري أنه قبل ما يبدا أي حفلة كيقرا الجمهور وكيحاول يفهم الأجواء باش يكون التواصل حاضر، وبالنسبة لعلاش بزاف ديال الفنانين كيبغيو يخدمو معاه، وضح أن السبب هو الراحة والتواضع وعدم التكبر، كما أكد أن سر التألق الفنانات كيرجع لسخونية الميزان وانسجام الكروب اللي شاد راسو، وختم بتوجيه تحية كبيرة للجماهير ديالو، وأكد أن الرجوع القوي للموسيقى الأمازيغية جا نتيجة الاجتهاد والخدمة المتواصلة.
فيديو الحوار :
https://www.facebook.com/share/v/1D6N7iupiP/
https://www.facebook.com/share/v/1AQB6gM3xg/