كود – عثمان الشرقي //
علن الفنان المصري محمد رمضان على استبعادو من المشاركة فالغناء فحفل اختتام كأس الأمم الإفريقية اللي كتدار فالمغرب، وعبّر على قلقو من الطريقة اللي تم فيها التعامل معاه، خصوصًا مع غياب أي اعتذار رسمي من الجهات المنظمة، وخا أنه شارك فتسجيل الأغنية الرسمية ديال البطولة على ما قال .
رمضان، ففيديو نشره فالحساب ديالو فـ“إنستغرام”، قال أنو توصّل فالبدية بميساج من منظمين البطولة كيقولو باللي المشاركة ديالو غادي تتأجّل من حفل الافتتاح لحفل الاختتام، وهاد الشي جا من بعد حملة اعترضات على كون فنان مصري يغنّي فافتتاح بطولة كتدار فالمغرب، ووضح أنو تقبّل القرار بروح رياضية، على اعتبار أن البطولة إفريقية، وأكّد فـنفس الوقت أنه فنان إفريقي قبل أي تصنيف آخر.
وزاد قال أنه قبل غير نهار واحد من موعد حفل الختام، تبيّن باللي الاسم ديالو ما كاينش ففقرات الحفل بلا حتى تواصل مسبق، الشي اللي خلا الوكيل ديالو يحاول يسول ولكن بلا نتيجة، وأشار أنه تاصل شخصيًا مع مسؤول مغربي، لي صيفط ليه فيديو لعمرو أديب وهو كيتكلم على مشكلة حسام حسن، محمد رمضان قال “أنا معنديش حتى علاقة بهادشي” واعتبر هاد الشي تبرير ما مفهومش وما عندو حتى علاقة بالموضوع.
محمد رمضان عبّر على التقدير الكبير ديالو للشعب المغربي بجميع فئاتو، وأكّد الاحترام ديالو للمملكة ولمؤسساتها، وتمنّى لها التوفيق والاستقرار.
https://www.instagram.com/reel/DTn8RH-CPl8/?igsh=Z3dxMGMydnYydjd5