سهام البارودي – كود//
المغربي فحال بزّاف ديال الشعوب ديال الجنوب عندهم تصور عاطفي للعلاقات و ماكايقدروش يخرجو منّو، كاينطالقو منّو و كايصحابهم گاع أنواع العلاقات كاتبنى على العاطفة… داكشي علاش شي وحدين مصرّين يخاويونا بزز مع أيتها بلاد باش ماكان، شحال هادي كنّا كانسمعو ديك خاوة خاوة مع الدزاير، شوية مابقاتش و ناضو المغاربة كايقلبو يتخاواو مع مصر ضاربو مع مصر شوية تخاواو مع السينيغال، خسرو مع السينيغال ضارو جيهت تونس ولاو توانسة هوما خوتنا في انتظار نقربلو باباها معاهم و نضورو جيهت شي بلاد اخرى نسعاو الأخوّة معاهم…
لي بزاف ديال المغاربة ماباغينش يفهموه هوا انه العلاقات بين الدول كاتبنى على المصلحة، الاتفاقيات، المعاهدات، الصراعات و فقط، العلاقات بين الدول ماكاتبناش على خويا و حبيبي، حيت الدول ماشي هوما مّك و خالتك لي يقدرو يتخاصمو حيت خالتك هرسات دوات فمّك و يتصالحو حيت مّك عرضات على خالتك للختانة ديالك.
العلاقات بين الدول ماكاتبناش على العاطفة يا راس الطّارو، داكشي علاش ألمانيا و فرانسا واخا تقاتلو و دّاگو سنين و منين و الالمان دخلو غتاصبو الفرنسيات وسط باريس، اليوم العلاقات بيناتهم متينة و مبنية على المصلحة الجيوسياسية ديالهم، و نفس الشيء بين فرانسا و النگليز مثلا لي دوزو قرون و هوما كايتناحرو و فاللخر نجحوا يكونو علاقات مبنية على المصلحة و فقط المصلحة، حيت كون عولو على العاطفة كوراهم مقاطعين الهضرة من القرن سبعطاش.
واش مثلا النگليز و فرانسا نساو التاريخ ؟
لا
واش تصالحو حيت كايتباغاو ؟
لا
واش حيت الفرانساوي كايعيط للنگليزي خويا ؟
لا
الدول كايتصالحو حيت كايشوفو بلي كاينة مصلحة كاتجمعهم، و كايتخاصمو حيت كايشوفو بلي كاين بيناتهم صراع و المصلحة كاتفرّقهم، فقط.
فا خويا المغربي، ختي المغربية، ها عار تالله لا ماخلي ديك العاطفة الجياشة ديالك عندك، و لا بغيتي شي اخ و لا اخت سير عند واليديك يصايبوه ليك.