كود – وكالات//
فريق ديال الباحثين من بزاف الدول علن أنه لقى لاتراس ديال يدين فواحد الكهف فجزيرة سولاويزي فإندونيسيا، وكيقدّرو العمر ديالها تقريبا بـ67 ألف و800 عام، وهاد الشي كيخلّيها أقدم فن صخري معروف حتى لدابا، هاد الطبعات تدارو بنفخ صباغة فوق ليدين اللي تحطّات على حيطان الكهف، وبان باللي كاين تعديل مقصود فطراف الصبيعات باش يبانُو رقاق، وهاد الشي كيدلّ على النية الفنية والرمزية.
العلماء مازال ما حسموش شكون دار هاد الرسومات، ولكن كيقدرو يا إمّا تكون من عند مجموعة بشرية قديمة بحال “دينيسوفان”، ولا من عند بشر بحالنا خرجو من إفريقيا وانتشرو فالشرق الأوسط حتى وصلو لآسيا وأستراليا فداك الوقت، التفاصيل الدقيقة والطريقة اللي تدار بها الرسم كيبينو بأن اللي دارها كان عندو وعي ومهارات فنية هاربة، وهاد الشي كيقوّي الفكرة باللي الفن بدا بكري بزاف كثر ملي كان متصوّر.
الباحثين باش يحدّدو العمر ديال هاد الطبعات، اعتمدو على تحليل ديال قشور معدنية اللي تجمّعات فوق الرسومات، وهاد الطريقة معروفة وكتستعمل بزاف فتعريف عمر فنون الكيفان النتائج ديال هاد الدراسة تْنشرت فمجلة “نيتشر”، وكيقولو العلماء باللي غا تساهم فإعادة فهم كيفاش بدا الفن عند الإنسان الأول والتغيّرات الثقافية اللي داز منها.
وزيد على هاد الشي، هاد الاكتشاف كيعطي قيمة كبيرة لإندونيسيا وكيأكد باللي راها من أكثر المناطق اللي عامرة بفنون الكيفان القديمة، بعدما كانت أوروبا ديما كتتعتبر هي الأصل ديال الفن البشري، بزاف ديال الباحثين كيشوفو باللي هاد النتائج خاصها تبدّل القصة اللي معروفة على تاريخ الفن.
https://arabic.euronews.com/culture/2026/01/22/handy-work-stencil-rock-paintings-found-in-indonesia-may-be-the-worlds-oldest-cave-art