كود سبور //
من بعد الروينة اللي ناضت فنهائي كأس إفريقيا 2025 بين المغرب والسنغال فالرباط، قررات الصحفية الفرنساوية ديال beIN Sports، فانيسا لو موين، تحبس تغطية الكرة مع اخر الموسم, القرار جا من بعد موجة ديال الكرتيك توصلات بها مباشرة من مورا مقابلة دارتها بعد الماتش، واللي اعتبروها بزاف ديال ناس مستفزة وخارجة على السياق.
فالحوار لي دارتو لو موين سولّات الحارس السنغالي إدوارد ميندي على صداع لي ناض فتريبنات، وعلى الناس اللي تهزو فالإسعاف، واش هاد الأجواء أثّرات على اللاعبين ، هاد الأسئلة وخا حساسة شوية ، يمكن تْتفهم فإطار نقل الصورة كاملة ديال الماتش و لكن النقطة اللي سيحات القطرة على الكاس هي فالسؤال اللي طرحاتو من بعد: واش إبراهيم دياز زگّل البينالتي بلعاني؟ سؤال اعتبروه المتابعين تشكيكي وماشي فمحلو وماعندو معنى .
هاد السؤال بالذات هو اللي قلب الرأي العام ضدها، وخلا حتى بزاف صحفيين ما يضامنوش معاها ، حيث شافوه تجاوز مهني لمبدأ حسن النية فالتحليل الرياضي ،فالسياق ديال الماتش إلا تاهمنا لاعب يضيع بيلانتي “متعمد” كيتقرا خيانة و تشكيك ماشي تحليل تقني.
من بعد كتبات فانيسا لو موين فـ“ستوري” على إنستغرام ووضحات باللي كانت كتدير غا خدمتها ، وقالت بلي فداك اللحظة ما كانتش عارفة واش الناس اللي شافتهم مهزوزين فالحمالات حيين ولا لا، وهاد الشي خلاها تطرح الأسئلة باش ما تخليش غير الإشاعات كدور فالسوشيال ميديا، ولكن وخا هكاك الواقعة كاملة كتخلّينا نسولو فين كيسالي التحليل الرياضي وفين كيبدا الاستفزاز والتشكيك !