كود سبور//
فالوقت اللي العقلاء فالسنغال كايحاولو يطفيو الغضب ويحلو الأزمة اللي تسبب فيها المنتخب السنغالي بالانسحاب من نهائي كاس أفريقيا أمام المنتخب الوطني المغربي، والشغب اللي داروه الجماهير السنغالية، خرج عبد الله فال رئيس الاتحاد السنغالي لكرة القدم على سرب العقلاء ديال بلادو، وناض كايوجه اتهامات للمغرب كلها كذوب وتخربيق وبهتان.
ونقل موقع “فوت ميركاتو” الفرنسي تصريحات خطيرة، قالها رئيس الاتحاد السنغالي لكرة القدم عبد الله فال، وجه فيها اتهامات خطيرة للمغرب، وقال: “المغرب كايسيطر على الاتحاد الإفريقي لكرة القدم، وباش نكونو واضحين راهم مسيطرين على كلشي ومتحكمين فكلشي”.
وكمل رئيس الاتحاد السنغالي لكرة القدم الهرطقات ديالو والكذوب، وقال: “ما كانش المغرب داير فبالو أن فريق آخر يقدر يمنعو من أنه يربح الكاس، وحتى شي منتخب ما عارض المغرب كيفما دارت السنغال”.
عبد الله فال حتى هو بحالو بحال مدرب السنغال ناض كايحول الخلافات ديال الاتحاد السنغالي لكرة القدم مع الكاف، لسبا باش يدخل المغرب فالموضوع زعما أن المغاربة كايتحكمو فالاتحاد الإفريقي، وهضر على لوطيل اللي عطاوهم الكاف قبل الفينال، وما هو تنظيمي من مسؤوليات الاتحاد الإفريقي وما عند المغرب حتى تدخل فيه.