كود – بني ملال//
عرف مطار بني ملال عام 2025 واحد التطور كبير فحركة الطيران وعدد المسافرين، مني تسجلات 590 رحلة جوية داز منها 78.202 مسافر، وهاد الشي كيبين باللي الثقة فهاد المطار ولات كتزاد والدور ديالو مهم فربط جهة بني ملال خنيفرة بالمغرب وبالخارج.
تصدر خط بيرغامو فإيطاليا لائحة الخطوط الأكثر استعمال، بـ214 رحلة نقلات 38.044 مسافر، بنسبة الشارج وصلات حتى 95%، وهاد الرقم كيعكس الطلب الكبير من طرف مغاربة العالم اللي ساكنين فطاليان، حتى خط خيرونا فإسبانيا بقى خدام مزيان، حيث تسجلات 218 رحلة و30.631 مسافر بنسبة ملء قرّبات لـ 75%.
أما الخط الداخلي بني ملال–طنجة، اللي بدا فشهر أبريل 2025، تسجلات فيه تقرييا 150 رحلة هزات 7 آلاف مسافر، بنسبة ملء ضعيفة ما فاتتش 32%، وهاد الشي كيطّرح تساؤلات، علاش الإقبال عليه باقي ضعيف وكيفاش خاصو يتسوّق مزيان.
ومن يونيو 2024 حتى نهاية 2025، وصل العدد الإجمالي ديال المسافرين اللي دازو من مطار بني ملال لـ119.431 مسافر من 862 رحلة، وهاد الأرقام كتبين المسار الطالع اللي كيعرفو هاد المطار.
فصيف 2026، علنت إدارة المطار باللي غادي تعزّز العرض الجوي، بجوج رحلات استثنائية لبيرغامو نهار 17 و24 فبراير، وزيد عليها ثلاث رحلات فالسيمانة لبيرغامو، وجوج رحلات فالسيمانة لخيرونا وطنجة ابتداءً من شهر أبريل، كثر من 90 فالمية ديال هاد الرحلات كتشدهم شركة رايانير الطيران بفضل أثمنتها الاقتصادية والتحفيزات لي مقدمة لها من المطار .
وخا هاد التطورات الإيجابية، كيطالبو فاعلين محليين والمجتمع المدني بفتح خطوط جوية جديدة من بني ملال لوجهات أخرى، بحال أليكانتي، بروكسيل، روما، وزيد عليها العيون والداخلة والسعودية فيلم الحج، حيث كيشوفو باللي هاد الخطوط غادي تعاون فتنشيط السياحة، وجلب الاستثمار، وتسهيل تنقل مغاربة العالم.