كود سبور//
سيرخيو راموس فالطريق للعب فالعراق؟ على ما بان، إدارة نادي القوة الجوية حلات خطوط التواصل مع مدير أعمال اللاعب الإسباني الدولي السابق، باش يجيبو الأسطورة لفريقهم فالدوري العراقي هاد الموسم.
رحيم الدراجي الناطق الإعلامي باسم الفريق العراقي قال لوكالة فرانس برس: “الإدارة ديالنا برئاسة معد بداي حلات قنوات الاتصال مع مدير أعمال راموس باش ينضم فالفترة ديال الانتقالات الشتوية”، وزاد: “كاين تفاعل إيجابي وكنستناو الرد النهائي والشروط ديال اللاعب بأقرب وقت”.
راموس اللي عندو 39 عام، سبق ليه يلعب مع ريال مدريد، إشبيلية، باريس سان جرمان ودابا مع مونتيري المكسيكي، وخاض 180 ماتش دولي مع منتخب إسبانيا. يعني ماشي لاعب عادي، راه مخضرم وعندو تاريخ كبير فالكرة.
رحيم الدراجي زاد قال: “إلى نجحت الصفقة، غادي نزيدو لاعب عندو ثقلو فالملعب، والمدرب رشيد جابر باغي لاعبين اللي يضيفو بزاف للتشكيلة ويعاونو القوة الجوية باش يرجع للمنصات”.
وزاد: “ماكاين حتى مشكل فدمج راموس فاللعب فدوري النجوم العراقي، غادي تزيد سمعة كبيرة للدوري، ولكن كنستناو نتفاهمو على العقد وطلبات اللاعب”.
القوة الجوية كاين فالمركز الرابع بـ25 نقطة بعد الجولة 13.