كود -كازا //
مزال فرقة “مسرح غرناطة” كتقدم عروضها المسرحية من خلال العمل ديالها “بورتري.. بغا يقول شي حاجة وحشم”، من تأليف وإخراج عمر جدلي، العرض الجديد غا يكون فالمركب الثقافي مولاي رشيد فكازا ، وكيهضر على موضوع حقوق المرأة و العنف ضدها وسط بيت الزوجية.
هاد العمل كيتكلم على قضية الزواج ديال بزز على العيالات فالمجتمع المغربي، من خلال معالجة مسرحية كتفتح النقاش على الإكراه الاجتماعي والضغط الأسري اللي كيتسلط على المرأة فاختياراتها المصيرية، و المعاناة النفسية والاجتماعية ديال الشخصيات النسائية.
المسرحية متقدم فثيم كوميدي كيعتمد على عناصر فرجوية جديدة ، بحال التعاويد والشطيح بمشاركة مجموعة من الممثلين المغاربة، المسرحية كتبغي توصل رسالة للمجتمع، مفادها أن اختيار شريك الحياة خاص يكون بيد المرأة بلا إكراه، وهو قرار مصيري كيأثر بشكل مباشر على مستقبلها، حيث كتجسد الممثلة مونية لمكيمل شخصية فنانة كترفض الزواج المفروض وكتلجأ للفن للتعبير على معاناتها الداخلية.