كود سبور//
بدات لجنة الانضباط بالاتحاد الإفريقي لكرة القدم، اليوم الثلاثاء التحقيق مع أطراف ملف نهائي كاس أفريقيا “المغرب2025″، واللي عرف احداث لا رياضية من الجانب السنغالي، أبرزها الانسحاب من الماتش وشغب الجماهير السنغالية اللي بغاو يهبطو للتيران لولا تدخل الامن فتيران مولاي عبد الله واللي عتق الموقف فالوقت المناسب.
وحسب مصادر مطلعة، بدا الاستماع لجميع الأطراف بالزوم، وتفريغ فيديوات الكاميرات ديال التيران للوقوف على كل كبيرة وصغيرة مع النظر فتقرير حكم الماتش ومراقبين المباراة، والتحقيق مفتوح مع مدرب السنغال بابي ثياو المتهم بتحريض لاعبي المنتخب السنغالي على الانسحاب والخروج من التيران بعد إعلان الحكم على بينالتي للمغرب، وهذا الشي ما فيهش تحلي بالروح الرياضية واحترام قرارات الحكم، وحتى حادث الفوطة والگول ديال السنغال ميندي اللي حدا المرمى ديالو وكلف الگول الثالث ديال السنغال باش يحضيها له وهذا الشي خلق مشكل مع الجمهور ولاعبين المنتخب المغربي.
التحقيقات مازال مستمرة، وحتى شي أعضاء من الطاقم التقني ديال السنغال غادي يتم التحقيق معهم من بينهم الجزائري اللي خدام مساعد مدرب، ومازال ما صدر حتى قرار، والقضية صعيبة عند السنغاليين حيث المدرب ثياو وعدد من اللاعبين ديالهم مهددين بعقوبات قاصحة بسبب سلوكهم فالفينال، اضافة لشغب الجماهير السنغالية فالماتش وهذا الشي من المنتظر يجر على الاتحاد السنغالي العقوبات.