كود – وكالات //
صادق البرلمان الفرنسي على مشروع قانون جديد كيمنع دراري والمراهقين لي قل من 15 عام من استعمال مواقع التواصل الاجتماعي، فخطوة الهدف منها هو بحميو دراري الصغار من الريسك ديال العالم الرقمي، بحال الإدمان، التنمر الإلكتروني، والمحتويات لي ما مناسبةش ليهم.
هاد القانون كيلزم المنصات الرقمية يتحققو من السن ديال المستخدمين، وكيشترط تاني موافقة الآباء ولا أولياء الأمور بالنسبة للي قل من 15 عام، وإلا غادي يتعرضو لعقوبات مالية إلا ما طبقوش هاد الإجراءات ، وهاد الشي داخل فإطار تشديد المراقبة على شركات التكنولوجيا الكبيرة وتحميلها مسؤولية فحماية دراري.
الرئيس الفرنسي إيمانويل ماكرون رحّب بهاد القانون واعتبرو خطوة مهمة لحماية الصحة النفسية ديال لوليدات والمراهقين، وقال باللي الدولة ما يمكنش تبقى ساكتة قدّام التأثيرات السلبية ديال الاستعمال الغير المراقَب للسوشيال ميديا.
ومن المرتقب يدخل هاد القانون التنفيذ فالأشهر الجاية، مع إعداد آليات تقنية وتنظيمية باش يتطبق مزيان، فنفس الوقت كيتسناو دول أوروبية أخرى تشوف نتائج هاد التجربة باش يمكن ليها تدير بحالها.