كود – وكالات //
كثر من 1500 واحد تفرض عليهم يخرجو من ديورهم بعد ما وقع انهيار أرضي طولو 4 كيلومترات فصقلية، الشي اللي خلا بزاف ديال الديور واقفين على طرف ديال الجبل فوضعية خطيرة بزاف.
هاد الانهيار جا من بعد إعصار وشتا خيط من سما ضرب مدينة نيسيمي فجزيرة صقلية نهار الأحد، وتسبّب فهبوط الأرض حتى لـ45 متر فبعض المناطق، ولحد الساعة ما تسجلات حتى إصابة ولا وفيات، ولكن كاينين ديور بزاف قرايبين يطيحو فاي لحظة.
الحكومة الإيطالية خصصات100 مليون يورو باش دعم الإغاثة، وعلّنات حالة الطوارئ الوطنية فكل من صقلية وسردينيا وكالابريا ،وقالت رئيسة الحكومة، جورجيا ميلوني، بلّي قلبها مع الساكنة المتضررة.
وخا ما تسجلات حتى خسائر بشرية، ولكن الخسائر المادية كانت تقيلة ، حيث الديور لي على الحافة غادي يريبو ، الانهيار دمّر أجزاء من البنية التحتية وشرد مئات العائلات.