گود سبور//
بالرغم من التهجم اللي كايتعرض له المغرب من الجيران ديالو، وخصوصا الجارة الشرقية الجزائر اللي دايرين حملة عدائية ممنهجة تجاه المملكة، وصلت حتى للجانب الرياضي، هدفها تعكل المغرب اللي هرب عليها بزاف، إلا ان المغاربة باقيين ديما محافضين على حسن الجوار واستقبال الضيف بالحب والاحترام والكرم، وهذا الشي اللي وقع مع الفريق الجزائري شبيبة القبائل.
بعثة شبيبة القبائل الجزائري وصلت للمغرب اليوم الخميس، استعدادا لمواجهة فريق الجيش الملكي الويكاند الجاي ضمن منافسات دوري أبطال إفريقيا، ولقات هذه البعثة الجزائرية فاستقبالها بمطار الرباط-سلا، مسؤولي نادي الجيش الملكي، واللي كبّرو بهم وتهلاو فيهم باستقبال ديال الحباب.
استقبال المغاربة لبعثة الفريق الجزائري بالرباط وكرامهم لهم، راه كايجي فواحد الجو مشحون بزاف، خصوصا مع صدور عقوبات الاتحاد الأفريقي لكرة القدم بخصوص فينال كاس افريقيا، واللي استهدفت بكل ظلم الطرف المغربي، وكانت خفيفة على السنغاليين صحاب الفوضى، وطبعا هذه العقوبات صدرت بهذا الشكل المقيت بضغط من اللوبي الفاسد المتحكم بالكاف، والمعادي للمغرب واللي كاينة فيه يد جزائرية، وبالرغم من هذا الشي راه المغرب ديما ماد يد الخير للجيران ديالو الجزائريين، والمغاربة استقبلو الفريق د شبيبة القبائل ممثل الجزائر بالحب والاحترام، عكسهم هما اللي شحال من مرة تعرضو فيها المغاربة للاعتداءات ومن بينهم منتخبات وأندية مغربية، وحتى الجمهور المغربي ولاو منعين عليه الفيزا باش يسافر للجزائر يشجع الاندية ديالو، كيفما وقع قبل سيمانا مع جمهور فريق الجيش الملكي.