گود سبور//
كشف مصدر مقرب من الدولي المغربي ايوب العملود لجورنال “گود”، انه فضل الرجاء الرياضي على عروض أخرى توصل بها، وانه راجع للبطولة باش ينافس وماشي باش يسالي الكورة.
ووضح مصدر قريب من أيوب العملود، أن الأخير فضل الانتقال للرجاء الرياضي حيث باغي يلعب مع فريق كبير وبمستوى عالي كيفما كان عليه من قبل مع الوداد الرياضي، اللي حقق معه ألقاب، وان اللاعب جاوه عروض خلال الساعات القليلة اللي فاتت قبل ما يسني مع الخضرا، ولكن اعتذر لهم ومن بينهم اندية فالبطولة، على راسهم المغرب الفاسي.
نفس المصدر اكد ان ايوب العملود قرر يرجع للبطولة الاحترافية عن قناعة، بعدما شرح للفريق ديالو الخالدية البحريني الموقف ديالو باش تفارق معهم وتفهمو هذا الشي، وان اللاعب سنا مع الرجاء الرياضي موسم ونص مع إمكانية اضافة موسم آخر، باش يعطي الإضافة اللي منتظرة منو للفريق الأخضر ويلعب على الألقاب، خصوصا وانه واحد من احسن الأظهرة اللي دازو فالبطولة الاحترافية خلال 10 سنتين اللي فاتت.