گود سبور//
باغيين نانت الفرنسي يطيرو بخدمات الدولي المغربي عثمان معما نجم المنتخب الوطني المغربي للشباب وواتفورد الممارس بالقسم الثاني د النگليز.
وحسب موقع “فوت ميركاتو” الفرنسي المتخصص فالانتقالات وصفات اللاعبين بأوروبا، فنانت الفرنسي دخلو فمفاوضات من البارح الاحد مع واتفورد النگليزي على قبل عثمان معما، وأنهم باغيين يحسمو الصفقة دغيا قبل ما يسد هذا الميركاتو الشتوي بأوروبا.
ومحتاجين نانت لتقوية هجومهم ضمن المجهودات ديالهم للبقاء بالقسم الفرنسي الأول، وعثمان معما باغي يزيد يبين الإمكانيات ديالو كثر باش يشارك مع المنتخب الوطني المغربي الأول فمونديال 2026 الصيف الجاي.