كود – ميدلت //
فدوّار تولال، فإقليم ميدلت دارت احتفلات الجالية اليهودية المغربية بذكرى وفاة الحاخام إسحاق بوحصيرة ، فجو ديال الاحتفال و التعايش ، مئات ديال اليهود المغاربة جاو نهار السبت من مدن المغرب وحتى على برا ، وتجمعو فـضريح هاد الولي اليهودي باش يحيّيو هاد المناسبة الدينية السنوية، اللي كتكون فرصة للتلاقي، والتآخي، وتقوية الروابط بين أفراد الجالية.
الاحتفال دار فحضور والي جهة ميدلت وعدد من المنتخبين، ورؤساء المصالح الخارجية، وشخصيات مدنية وعسكرية. الحاضرين ردّدو أناشيد دينية وروحية، ورفعو الدعاء باش يعطي الله الصحة وطول العمر لسيدنا ويبارك فولي العهد مولاي الحسن، والأمير مولاي رشيد، وكاع أفراد العائلة الملكية.
الحاخام إسحاق بوحصيرة كيتعتبر واحد من كبار أولياء اليهود المغاربة، لي معروف عند يهود العالم، ومرتبط اسمو بكرامات وقصص دازت من جيل لجيل ،الضريح ديالو فمنطقة تولال ولى قبلة روحية لليهود المغاربة، اللي كيجيو ليه يترحمو، يدعيو، ويجددو الارتباط ديالهم بتاريخهم وجذورهم فهاد الأرض، فصورة كتجسد العمق ديال التعايش الديني والثقافي اللي تميّز به المغرب هادي القرون