وكالات//
علنت منصة نتفليكس نهار الثلاثاء باللي غادي تتكلف بالبث المباشر ديال حفلة الرجوع ديال الفرقة الكورية الجنوبية BTS، فحدث موسيقي عالمي متوقّع يكون هو الأكبر ديال الكيبوب حتى لدابا، حيث غادي يتبثّ الحفل فـأكثر من 190 دولة فالعالم.
الفرقة، اللي كتعتابر وحدة من أشهر الفرق الموسيقية فكوريا الجنوبية، كانت حبسات النشاط ديالها من عام 2022 بسبب الخدمة العسكرية الإلزامية ديال الأعضاء ديالها، ومن بعد كملّاو السبعة كاملين الخدمة ديالهم العام اللي فات.
وعلنت الفرقة كذلك على إصدار ألبوم جديد سميتو “أريرانغ” ARIRANG نهار 20 مارس، ومن بعدو غادي يديرو حفلة مجانية فساحة غوانغهوامون فوسط سيول نهار من بعد، قبل ما يبداو الجولة العالمية ديالهم.
وأكدات نتفليكس، حسب وكالة “فرانس برس”، باللي الحفلة غادي تكون حصرية ومباشرة على المنصة ديالها نهار 21 مارس.
وكيتعتابر ألبوم “أريرانغ” أول عمل موسيقي جديد للفرقة من بعد ألبوم “بروف” اللي دار مبيعات كبيرة فكوريا الجنوبية عام 2022، وكيقدّم الألبوم الجديد “نظرة عميقة على أصول الفرقة والهوية ديالها”، حسب تصريحات نتفليكس.