’’دابا أنا غير فرنساوي‘‘.. الكاتب بوعلام صنصال مبقاتش عندو الجنسية الجزائرية

كود ـ لوفيغارو //

قال الكاتب بوعلام صنصال، اللي خرج فشهر نونبر اللي فات من بعد ما دوز عام ديال الحبس فالجزائر، (قال) بلّي تحيدات ليه الجنسية الجزائرية، وولا كيشوف راسو دابا ’’غير فرنساوي‘‘، هاد الكلام قالو صنصال نهار الخميس، فزيارة دارها لثانوية إدغار كينيه فالدائرة التاسعة فباريس، بدعوة من رئيسة جهة إيل دو فرانس فاليري بيكريس.

جريدة “لوفيغارو” الفرنسية نقلات عليه بلّي كاين شي إجراءات إدارية مازال ما سالاتش، ولكن هو متيقّن بلّي فعلياً ما بقاتش عندو  الجنسية الجزائرية، صنصال كان تشدّ مباشرة منين وصل للجزائر وهو جاي من باريس، بتهم كتهم “المسّ بوحدة البلاد”، بسبب تصريحات دارها فالإعلام وللي ناض عليها صداع، ومن بعد تفرّج عليه فآخر العام اللي فات بعفو رئاسي من عند عبد المجيد تبون.

بوعلام صنصال معروف بزاف فالميدان الثقافي الفرنكفوني، ودابا سنين وهو داخل فالنقاشات السياسية والفكرية اللي كتهم العلاقة بين فرنسا والجزائر، وحرية التعبير، الكاتب اللي عندو دابا 81 عام، دخل مؤخراً للأكاديمية الفرنسية، من بعد ما تْنتخب فجلسة مسدودة دازت تحت قبة المعهد حدا نهر السين فباريس.

إقرأ الخبر من مصدره