كود – عثمان الشرقي //
فزيارة ميدانية دارتها “كود” لعدد من المناطق الجبلية بالمغرب، عبّرات لنا الساكنة على معاناتها اليومية مع ضعف الريزو وغياب الأنترنت، خصوصاً ففصل الشتا مع أول تساقطات مطرية ولا ثلجية مني كيتقطع السينيال شحال من نهار، وكتولي مناطق كاملة معزولة على العالم الخارجي.
مشكل الربط بالأنترنت فالجبال مشكل بنيوي مرتبط بطبيعة التضاريس ، والبعد ديال الدواوير، والعلو ديال الجبال، هاد العوامل كتخلّي لانستالاسيو ديال البوطويات والكابلات الأرضية عملية معقّدة وساوية ، وكتخلي شركات الاتصالات صعيبة عليها توسع او تصلح المشكل فكل مرة، خصوصا فوقيتة ديال الثلج والشتا مني كيطيح الريزو اونبان، هادشي لي كيعمّق الهوّة الرقمية مابين المجال الجبلي والمجال الحضري.
هاد البلوكاج ديال الريزو كيقيس بشكل مباشر الحياة اليومية ديال الناس ،حيت ولى ضروري باش الساكنة تسول على حبابها، تطلب العوين، تقلب على الطبيب، العلف، النقل، الإسعاف، خصوصا إلا كانت العزلة بسباب الثلج وتسدات الطريق .
فهاد السياق، بدات الدولة مؤخراً كتهضر على حلول بديلة، من بينها الاعتماد على تقنية الأقمار الصناعية، وبالخصوص “ستارلينك”، كحل للمناطق اللي صعيب تربط بالشبكات الأرضية، الحكومة علنات على دعم مالي كيوصل حتى لـ2500 درهم لكل اشتراك، لفائدة 4000 مستفيد سنوياً ،هاد الخدمة كتبان اليوم بلان عملي، حيث هاد سيرفيس ما كيحتاجش بنية تحتية وكتخدم حتى فالفيلاجات الجبلية المعزولة.
عدد من الدول الإفريقية سبقاتنا لهاد القضية بحال نيجيريا، كينيا، غانا، رواندا، زامبيا، بوتسوانا، والسنغال اللي دخلات للخدمة فهاد الشهر ديال فبراير 2026، وحتى الصومال وتشاد والكونغو الديمقراطية، عطاو مؤشرات مزيانة على الدور اللي يمكن تلعبو هاد التكنولوجيا فربط القرى الجبلية والمعزولة بالعالم الرقمي.
السؤال ما بقاش هو واش خاص الريزو يوصل للجبال،ولكن إمتى وكيفاش وبشحال ، حيث بلا ربط رقمي الهضرة على التنمية القروية والجبلية كتبقى غير مشاريع خارج التغطية .