وكالات//
إسبانيا علّنات على خطوة جديدة باغية بها تعزّز سلامة الأطفال والمراهقين فالفضاء الرقمي، بحيث كشف رئيس الحكومة بيدرو سانتشيث أن البلاد ناوية تمنع استعمال مواقع التواصل الاجتماعي على اللي أقل من 16 عام، وهاد الشي مع إلزام المنصّات الرقمية تطبّق أنظمة صارمة باش تتحقق من السن، حسب ما نشرت وكالة رويترز.
وجا هاد الإعلان فواحد الكلمة اللي دارها سانتشيث اليوم الثلاثاء، على هامش قمة الحكومات العالمية فدبي، وركّز فيها على أن الأطفال ولات كتعرّض لمحتوى ما مناسبش لأعمارهم، وقال:
“وليداتنا كيتواجدو فوسط رقمي ما كانش خاصهم يتصفحو فيه بوحدهم… وما غاديش نقبلو يبقى هاد الوضع هكذا”.
ووضّح رئيس الحكومة أن هاد الخطوة داخلة فإطار حزمة ديال إجراءات أوسع باش تضمن بيئة رقمية أكثر أماناً، خصوصاً مع تزايد التخوّفات من انتشار خطاب الكراهية، والمحتوى الإباحي، والمعلومات المضلّلة فمواقع التواصل، والآثار النفسية والاجتماعية السلبية اللي كاتخلّيها على القاصرين.