البطولة: الرجا رجعو لتضياع النقاط وخسرو أول ماتش فهاد الموسم بهزيمة مع الكوديم

كود سبور//

رجعو الرجاء الرياضي لمسلسل تضييع النقاط، وخسرو ماتش مهم اليوم الاحد مع النادي المكناسي فتيران مكناس، برسم الدورة 11 من البطولة الاحترافية لكرة القدم.

وسالا الماتش بين الرجاء الرياضي والمضيف ديالهم النادي المكناسي بنتيجة واحد لزيرو لمصلحة الكوديم، واستغلو المعنويات اللي بدات كاتنزل عند لاعبين الرجا بعد تضييع ادم النفاتي لبينالتي مع نهاية الشوط الاول، وفالشوط الثاني قدرو الكوديم يماركيو هدف بسبب روينة كانت فدفاع الرجا والمدافع الرجاوي اسماعيل مقدم بغا يديگاجي الكورة وهو يضربها فوجه صاحبو الشريبي وتماركات عليهم وهذا الشي فالدقيقة 71، ومن وراها الرجا حاولو يرجعو فالماتش وخلقو بزاف ديال الفرص ولكن تألقو الگول ودفاع الكوديم وقدرو يحافظو على النتيجة حتى سالا الماتش.

وبهذه النتيجة ضيعو الرجاء الرياضي تاني 3 نقاط، كانت غاتعطيهم صدارة البطولة مؤقتا، وبقاو محتلين المركز الثالث برصيد 19 نقطة بفارق نقطة واحدة مؤقتا عن المغرب الفاسي والوداد الرياضي المتصدرين، وهذه اول خسارة للخضرا مقابل 4 التعادلات و 5 الرباحات، اما النادي المكناسي وصلو على الخضرا بهذا الرباح وعندهم 19 نقطة حتى هما.

إقرأ الخبر من مصدره